Visjonen til Hålandsdalen leirskule er, intet mindre enn, «Læring for livet» - med bakteppet som «ei veke du hugsar resten av livet og som gjev kunnskap du får bruk for heile livet». For å nå dette, er det viktig å skape minner – minner gjennom opplevingar saman med andre. Dette kan vera fellesskapet på rommet du bur eller meistringa du opplever ved å padle kano. Men ein sjeldan gong ligg minna, eller skatten om du vil, rett under føtene dine.
Onsdag ettermiddag denne veka, var metallsøk inne som ein av friluftsaktivitetane elevane kunne velja mellom. Onsdag var bygdedag med bygdedagsaktivitetar om føremiddagen og dei nemnde friluftsaktivitetane om ettermiddagen. Elevane kunne velje mellom stjerneorientering, matlaging ute, klatring, rappellering eller metallsøk. Gruppa som hadde metallsøk nytta seg av nærområdet til leirskulen og litt ute i økta varsla metalldetektoren om metall under føtene til nokre av elevane. Etter ei lita graveøkt dukka det opp, intet mindre enn, ein del av ei sølvskei. Restar av jern og anna metall brukt til arbeid er ikkje uvanleg å finne, men sølv er absolutt sjeldan vare – og absolutt minner som blir med både oss og elevane vidare.
I tillegg til bygdedag og friluftsaktivitetar har alle elevane, denen veka, både vore til Øykjefjell og lært om flysleppa i Hålandsdalen under 2.verdskrig. Dei har òg vore på Vengsvatnet der me padla kano, rodde (robåt) og studerte fisk. Nye aktivitetar for mange og nye minner og opplevingar for alle.
Alle delane av ei leirskuleveke vil kunne skape minner for livet – enten dei skjer utandørs eller innandørs. I skrivande stund, fredag ettermiddag, har nettopp elevar og lærarar trilla ut av leirskuletunet i kvar sin buss. Forhåpentlegvis med minner og opplevingar som blir liggjande i kvar enkelt si «skattekiste».
Takk for besøket til alle lærarar og elevar frå både Smørås og Kringlebotn.