Det gjeld å nytte vekstsesongen til det fulle. Nede i lavlandet er plantene i full vekst i desse dagar. Dyra blir flytta rundt på ulike beiteområde – både for å utnytte planteveksten, men òg for å skåne dyra for moglege snyltarar og parasittar. I tillegg er «slåtten» i gong for fullt – då vinterfòret skal sikrast.
Elevane frå Bjørndalsskogen og Sælen har, mellom anna, tatt del i ein liten bit av denne verda. På leirskulen sitt område har me hatt sau og lamb på beite i fleire veker allereie. I tillegg har nokre av elevane vore med på å slå gras som blei servert til sauene som ekstrafòr no rett før dei skal på fjellbeite.
Dette var ein av bygdedagsaktivitetane våre denne veka. Nettopp bygdedagen vår er dagen då me prøver oss som gardbrukarar, handverkarar eller liknande omtrent slik det kunne gått føre seg på slutten av 1800-talet. Elevane er med på å bestemme kva stasjon/aktivitet dei vil vera på – og så får dei prøve seg på ein slik stasjon.
Utover bygdedagen så har alle elevane hatt ein dag på vatn denne veka. Sælen nytta sin vassdag på Vengsvatnet der dei padla kano og studerte fisk. Medan Bjørndalsskogen var på Gjønavatnet med tema som kanopadling, landskapsformer og busetnaden inne i Kikedalen.
Med 2. pinsedag på måndag var dette ei, såkalla, 4-dagars veke. Det betydde at tysdag var velkomstdag, onsdag bygdedag, torsdag utedag på vatn og fredag avreisedag. Bygdedagen vart avslutta med friluftsaktivitetar om etteriddagen og med besøk hjå familien Håland på kvelden.
Ei, litt ekstra kort, leirskuleveke er til ende. Nokre reiser heim og skal direkte vidare til fotballcup, medan andre har heilt andre planar for junihelga som kjem.
Takk for ei flott veke saman med lærarar og elevar frå Bjørnsdalsskogen og Sælen.