«Eg skal seie deg «far» at dengang var det ikkje heilt ufarlig å ferdast på Gjønaisen ein vinters dag. Det henge i meg dette, etter gammalt at eg aldri «fer» over eit isa vatn utan at eg i det minste har med meg ein kjelke eller ei buske etter meg, den dag i dag, særlig på tynn is. So han viste vel kva han gjorde, karen.»
Utsagnet ovanfor er henta frå ein av versjonane til «Sagnet om Kikedalsbonden». Sagnet fortel, mellom anna, at Kikedalsbonden, Jon, nytta seg av isen på Gjønavatnet då han transporterte presten med seg inn til Kikedalen midt på 1300-talet.
Dette er noko av det som elevane har fått høyre om på deira ferd innover isen på Gjønavatnet. Det er lenge mellom kvar gong dette er mogleg å gjere – så då sjansen no baud seg, med trygg is og fantastiske skøyteforhold, ja då var det berre å rigge turdag på skøyter til Kikedalen.
For elevane frå Ulsmåg og Sædalen var turen til Kikedalen ein av mange undervisningsaktivitetar denne veka. Tysdag og torsdag var begge fulle utedagar – halvparten var til Kikedalen og halvparten til Bygdastølen på ski. På denne måten fekk alle elevar oppleve vinterleirskule med både snø og is.
Onsdag hadde me bygdedag – dagen då me skrur tida tilbake til slutten av 1800-talet og prøver oss på aktivitetar og arbeidsoppgåver slik dei kunne ha sett ut på den tida.
Onsdag ettermiddag var mange elevar på Vengsvatnet og prøvde seg på isfiske, medan resten nytta ettermiddagen utandørs til å lage mat på bål.
Måndag var, som vanleg, innreisedag med alt som føl med av bli-kjend aktivitetar og opplæring i leirskulerutinar. Fredagvar utreisedag med sine faste rutinar – det handla om utpakking, rollespel i gamle Holdhus kyrkje, avsluttande lunsj og deretter avreise heim til familie og venner der heime.
Takk for ei aldeles strålande veke saman med både lærarar og elevar frå Sædalen og Ulsmåg.